Синоптиктердің мәліметінше, дүйсенбі күні елдің солтүстік-батыс, солтүстік және оңтүстік өңірлерінде қар жауады. Солтүстік-батыс пен солтүстікте жаяу бұрқасын мен боран күтіледі.

Республиканың басқа аймақтарында жауын-шашынсыз, аязды ауа райы сақталады. Ел аумағы бойынша тұман түсуі, көктайғақ болуы және желдің күшеюі болжанып отыр.

Түнгі уақытта Шығыс Қазақстан облысында және Абай облысының шығыс бөлігінде ауа температурасы -40°C-қа дейін төмендейді. Жетісу облысында аяз -22…-27°C аралығында болады. Ал Маңғыстау облысының солтүстік-шығысында ауа температурасы -22°C-қа дейін жетеді.

Сондай-ақ Шығыс Қазақстан облысының солтүстік және шығыс аудандарында түнде өте қатты аяз байқалып, температура -45°C-қа дейін төмендеуі мүмкін. Синоптиктер бұл өңірлерде ауа райы аса суық болатынын ескертеді.