Министрдің айтуынша, 2026 жылғы 15 наурызда Қазақстанда жаңа Конституция жобасын қабылдау мәселесі бойынша республикалық референдум өтеді. Егер азаматтардың басым бөлігі жаңа Конституцияны қолдаса, дәл осы күн - 15 наурыз Қазақстандағы жаңа мемлекеттік мереке, яғни Конституция күні болып белгіленуі мүмкін.

Ерлан Сәрсембаевтың сөзінше, жаңа Конституция жобасының 94-бабында бұл мәселе нақты көрсетілген. Аталған баптың екінші тармағына сәйкес, республикалық референдумда Конституция қабылданған күн мемлекеттік мереке болып жарияланады.

"Егер халық дауыс беріп, Конституцияның жаңа редакциясын қолдаса, 15 наурыз Конституция күні ретінде белгіленеді. Тиісінше, қазіргі 30 тамыздағы Конституция күні күшін жояды. Барлығы азаматтардың референдумда қабылдайтын шешіміне байланысты", - деді министр.

Журналистер брифинг барысында «биыл 30 тамызда Конституция күні атап өтіле ме?» деген сұрақ қойғанда, министр бұл мәселенің барлығы референдум нәтижесіне байланысты екенін қысқа ғана жауаппен түсіндірді.

Айта кетейік, бұған дейін Қазақстан Республикасы Еңбек және халықты әлеуметтік қорғау министрлігі де осы мәселе бойынша түсініктеме берген болатын. Ведомствоның мәліметінше, егер референдум нәтижесінде Конституция күні басқа күнге бекітілсе, тиісті заң күшіне енген сәттен бастап 30 тамыз мемлекеттік мереке мәртебесінен айырылуы мүмкін.

Осылайша, алдағы 15 наурызда өтетін республикалық референдум тек жаңа Конституцияны қабылдау мәселесін ғана емес, сонымен қатар Қазақстандағы маңызды мемлекеттік мерекелердің күнін де өзгертуі ықтимал.