Қазақстан Сыртқы істер министрлігі Таяу Шығыстағы қақтығыс аймағынан азаматтарды эвакуациялау жұмыстарын жалғастырып жатыр. Ведомствоның ресми өкілі Ерлан Жетібаев брифинг барысында эвакуация басталғалы бері 8585 қазақстандықтың елге қайтарылғанын хабарлады. Бұл шара аймақтағы қауіпсіздік жағдайының күрделенуіне байланысты отандастардың өмірі мен қауіпсіздігін қамтамасыз ету үшін жүзеге асырылуда.
Министрлік мәліметінше, эвакуация жұмыстары уәкілетті мемлекеттік органдар мен резидент және шетелдік әуе компанияларының қатысуымен ұйымдастырылып жатыр. Сонымен қатар, азаматтарды қауіпсіз аймақтарға шығару тек әуе рейстері арқылы ғана емес, құрлықтағы бағыттармен де жүргізілуде. Атап айтқанда, Әзербайжан, Армения және Түркіменстан шекаралары арқылы қазақстандықтарды шығару жұмыстары ұйымдастырылған.
Ерлан Жетібаевтың айтуынша, қазіргі уақытқа дейін қазақстандықтардың арасында қаза болғандар немесе зардап шеккендер туралы ақпарат тіркелмеген.
Алдағы күндері эвакуациялау жұмыстары жалғасады. Жоспар бойынша, Израильден 78 азамат, Қатардан шамамен 350 адам, Біріккен Араб Әмірліктерінен 550-ге жуық азамат, сондай-ақ Сауд Арабиясынан шамамен 300 қазақстандықты елге қайтару көзделіп отыр. Министрлік бұл көрсеткіштердің жағдайға байланысты өзгеруі мүмкін екенін атап өтті.
Сондай-ақ Иран аумағынан 66 Қазақстан азаматы эвакуацияланған.
Таяу Шығыстағы жағдай соңғы апталарда күрт шиеленіскен. 2026 жылғы 28 ақпанда Израиль мен АҚШ Иранға соққы жасаған, оған жауап ретінде Иран Израильдегі және араб елдеріндегі АҚШ әскери базаларына шабуыл жасаған. Кейін аймақтағы жағдай одан әрі ушығып, әскери қақтығыстар жалғасып жатыр.
Осыған байланысты Қазақстан билігі аймақта жүрген азаматтарды елге қайтару және олардың қауіпсіздігін қамтамасыз ету бағытында жұмыстарды күшейтіп отыр.
Ұқсас жаңалықтар
