19 маусым, 2026
Кез келген өңірдің дамуы өндірілген өнім көлемімен немесе тартылған инвестициямен ғана өлшенбейді. Оның нақты нәтижесі тұрғындардың тұрмыс сапасынан, жұмыспен қамтылу деңгейінен, әлеуметтік қолдаудың тиімділігінен және өмір сүруге қолайлы ортаның қалыптасуынан көрінеді. Осы тұрғыдан алғанда Т.Рысқұлов ауданында экономикалық өсім әлеуметтік саламен қатар өріліп, халықтың әл-ауқатын жақсартуға бағытталған жұмыстар жүйелі түрде жалғасып келеді, деп хабарлайды baq-orda.kz.
Соңғы жылдары ауданда жаңа өндіріс орындарының ашылуы мен кәсіпкерліктің дамуы еңбек нарығына оң ықпал етті. Биылғы бес айдың өзінде бірнеше инвестициялық жоба іске қосылып, жүзге жуық жаңа жұмыс орны құрылды. Ал алдағы жылдары жүзеге асатын ірі жобалардың нәтижесінде тағы жүздеген тұрғын тұрақты жұмыспен қамтылмақ. Бұл халықтың табысын арттырып қана қоймай, әлеуметтік тәуелділікті азайтуға мүмкіндік береді.
Бүгінде аудан бойынша жұмыссыздық деңгейі 4,8 пайызды құрап отыр. Бұл көрсеткіш еңбек нарығындағы тұрақтылықтың сақталғанын аңғартады. Әсіресе мемлекеттік бағдарламалар арқылы ауыл тұрғындарының кәсіп бастауына, мал шаруашылығын дамытуына және шағын бизнесті кеңейтуіне жасалып отырған қолдау өз нәтижесін беруде. Экономикалық белсенділіктің артуы тұрғындардың өз еңбегі арқылы табыс табуына жол ашып келеді.
Мұның нақты дәлелі ретінде атаулы әлеуметтік көмек алушылар санының азаюын айтуға болады. Биыл мемлекеттік атаулы әлеуметтік көмек алатын 76 отбасы немесе 472 азамат бұл санаттан шыққан. Бұл көрсеткіш әлеуметтік қолдаудың қысқарғанын емес, керісінше азаматтардың тұрақты табыс көзін тауып, өз тұрмысын жақсарта бастағанын білдіреді. Мемлекеттік саясаттың негізгі мақсаты да – азаматтарды ұзақ мерзімді әлеуметтік тәуелділіктен шығарып, еңбек арқылы әл-ауқатын арттыруға жағдай жасау.
Әлеуметтік саясаттың тағы бір маңызды бағыты – тұрғын үймен қамтамасыз ету. Биыл аудан бойынша бюджет қаражаты есебінен 20 пәтер сатып алынып, баспана кезегінде тұрған азаматтарға берілуде. Өз үйіне қол жеткізу – көптеген отбасы үшін өмір сапасын жақсартатын маңызды әлеуметтік қадам. Сондықтан тұрғын үй мәселесін кезең-кезеңімен шешу жергілікті биліктің басым бағыттарының бірі болып қалып отыр.
Әлеуметтік инфрақұрылымның дамуы да тұрғындардың күнделікті өміріне тікелей әсер етеді. Қазіргі таңда ауданда жаңа спорт мектебі, мәдениет үйі, мектеп жанындағы спорт залы және теміржол вокзалы секілді әлеуметтік маңызы бар нысандардың құрылысы жүргізілуде. Бұл жобалар балалардың сапалы білім мен спортқа қолжетімділігін арттырып қана қоймай, мәдени өмірдің жандануына және ауданның тартымдылығын күшейтуге мүмкіндік береді.
Тұрғындардың өмір сапасын жақсартуда инженерлік инфрақұрылымның маңызы зор. Бүгінде аудан халқы толықтай орталықтандырылған ауыз сумен қамтамасыз етілген. Табиғи газбен қамту деңгейі 99,4 пайызға жеткен. Жолдардың жағдайы жақсарып, көшелерді жарықтандыру жұмыстары кезең-кезеңімен жалғасуда. Мұндай өзгерістер күнделікті тұрмысқа қолайлылық әкелумен қатар, ауылдық елді мекендерде өмір сүру деңгейін қаламен салыстыруға мүмкіндік беретін жағдай қалыптастыруда.
Әлеуметтік тұрақтылықтың тағы бір көрсеткіші – ерекше қажеттілігі бар азаматтарға көрсетілетін қолдау. Қазіргі таңда аудан бойынша 1934 мүгедектігі бар адам тіркелген. Бұл санаттағы тұрғындарды әлеуметтік қорғау, оңалту қызметтерін көрсету және қажетті мемлекеттік қолдау шараларын ұйымдастыру жұмыстары тұрақты түрде жүргізілуде.
Экологиялық жобалар да тұрғындардың өмір сапасын арттырудың бір бөлігіне айналып отыр. «Таза Қазақстан» акциясы аясында аудан көлемінде жүз мыңнан астам ағаш отырғызылып, көгалдандыру жұмыстары жүйелі түрде жалғасуда. Жасыл аймақтардың көбеюі экологиялық жағдайды жақсартып қана қоймай, тұрғындарға жайлы әрі қауіпсіз орта қалыптастыруға мүмкіндік береді.
Бүгінде Т.Рысқұлов ауданында әлеуметтік саясат тек жәрдемақы немесе қолдау көрсетумен шектелмейді. Оның басты мақсаты – халықтың өз мүмкіндігін іске асыруына жағдай жасау, жаңа жұмыс орындарын ашу, сапалы инфрақұрылым қалыптастыру және өмір сүруге қолайлы орта құру. Экономикалық даму мен әлеуметтік тұрақтылықтың қатар жүруі ауданның ұзақ мерзімді дамуына берік негіз қалыптастырып отыр. Ең бастысы – атқарылып жатқан жұмыстардың нәтижесі әрбір тұрғынның күнделікті өмірінен көріне бастағаны.
