15 маусым, 2026
Экономикалық өсім тек статистикалық көрсеткіштермен емес, халықтың күнделікті тұрмысындағы оң өзгерістермен өлшенеді. Жолдың жөнделуі, таза ауыз судың қолжетімділігі, жаңа жұмыс орындарының ашылуы, инвестицияның артуы – мұның барлығы өңірдің даму қарқынын айқындайтын негізгі көрсеткіштер. Осы тұрғыдан алғанда Т.Рысқұлов ауданында жыл басынан бері атқарылған жұмыстар өңір экономикасының тұрақты бағытта дамып келе жатқанын көрсетеді, деп хабарлайды baq-orda.kz.
Биылғы бес айдың қорытындысы бойынша ауданның жалпы шығарылған өнім көлемі 21,3 миллиард теңгеге жетіп, жоспарланған межеден 3,2 миллиард теңгеге артық орындалды. Бұл көрсеткіш аудан экономикасының бірнеше саласында бір мезгілде өсімнің қалыптасқанын аңғартады. Әсіресе өнеркәсіп өндірісі қарқын алып, өндірілген өнім көлемі 9,4 миллиард теңгені құрады. Өткен жылдың сәйкес кезеңімен салыстырғанда нақты көлем индексі 109,3 пайызға жетуі өндірістік әлеуеттің біртіндеп кеңейіп келе жатқанын дәлелдейді.
Ауыл шаруашылығы да аудан экономикасының негізгі тіректерінің бірі болып қала береді. Салада өндірілген өнім көлемі 5,9 миллиард теңгеге жетіп, өткен жылмен салыстырғанда өсім сақталды. Мал шаруашылығының тұрақты дамуы мен егін шаруашылығындағы жоспарлы жұмыстар аудан тұрғындарының негізгі кәсібінің нәтижелі екенін көрсетеді. Биыл 11 шаруашылықтың қант қызылшасын өсіруге басымдық беруі, ауыл шаруашылығы техникаларының жаңартылуы және жеңілдетілген дизель отынының бөлінуі агроөнеркәсіп кешенін қолдау шараларының нақты нәтижесін көрсетіп отыр.
Өңірдің экономикалық белсенділігі инвестициялық көрсеткіштерден де айқын байқалады. Негізгі капиталға салынған инвестиция көлемі 7,5 миллиард теңгеге жетіп, өткен жылдың сәйкес кезеңімен салыстырғанда 185,8 пайызды құрады. Бұл – өңірге деген сенімнің артқанын білдіретін маңызды көрсеткіш. Биылдың өзінде қоғамдық тамақтану, білім беру, өнеркәсіп және ауыл шаруашылығы бағыттарында бірнеше ірі жоба іске қосылып, ондаған жаңа жұмыс орны ашылды. Алдағы жылдары жалпы құны 40 миллиард теңгені құрайтын 12 инвестициялық жобаның жүзеге асуы аудан экономикасына жаңа серпін бермек.
Әлеуметтік инфрақұрылымды дамыту да назардан тыс қалған жоқ. Қазіргі таңда аудан халқы толықтай орталықтандырылған таза ауыз сумен қамтылған. Сонымен бірге үш елді мекендегі ауыз су жүйесін жаңғыртуға республикалық бюджеттен қаржы сұратылып отыр. Газдандыру жұмыстарының нәтижесінде аудан халқының 99,4 пайызы табиғи газ тұтыну мүмкіндігіне ие болды. Бұл тұрғындардың өмір сүру сапасын жақсартуға бағытталған маңызды қадамдардың бірі.
Жол инфрақұрылымын жақсарту мәселесі де кезең-кезеңімен шешілуде. Қазіргі уақытта аудандық маңызы бар жолдардың қанағаттанарлық деңгейі 98 пайызға жеткен. Сонымен қатар ондаған көше мен аудандық жолдарды жөндеуге арналған жобалық-сметалық құжаттар әзірленіп, республикалық бюджетке өтінім жолданған. Жол қауіпсіздігін қамтамасыз етуге де арнайы қаржы қарастырылған.
Тұрғындардың әлеуметтік жағдайын жақсарту бағытында да жүйелі жұмыстар жалғасуда. Биыл аудан бойынша 20 пәтер сатып алынып, баспанаға мұқтаж азаматтарды тұрғын үймен қамтамасыз ету мәселесі кезең-кезеңімен шешілуде. Мемлекеттік атаулы әлеуметтік көмек алушылар санының азаюы халықтың өз табысын арттыруға мүмкіндік алғанын көрсетсе, жұмыссыздық деңгейінің 4,8 пайыз шамасында сақталуы еңбек нарығындағы тұрақтылықты білдіреді.
Экологиялық бағыттағы жұмыстар да ерекше назарда. «Таза Қазақстан» акциясы аясында жыл басынан бері 115 мыңнан астам көшет отырғызылып, күзде тағы 20 мың ағаш егу жоспарланған. Жыл қорытындысында аудан аумағында 137 мың түп ағаш отырғызылып, елді мекендердің жасыл желегін көбейту көзделіп отыр.
Т.Рысқұлов ауданындағы биылғы көрсеткіштер өңірдің дамуы бір ғана бағытпен шектелмейтінін аңғартады. Экономика, ауыл шаруашылығы, инвестиция, инфрақұрылым және әлеуметтік саладағы жұмыстар өзара сабақтасып, ауданның тұрақты дамуына негіз қалыптастыруда. Жоспарланған жобалардың толық жүзеге асуы өңірдің инвестициялық тартымдылығын арттырып қана қоймай, халықтың әл-ауқатының жақсаруына да тікелей ықпал ететіні сөзсіз.
