Бүгін, 09:22
Өңірдегі ауыл тұрғындарының баспана жағдайын жақсарту бағытындағы жұмыстар жүйелі түрде жалғасып келеді. Бағдарламаның алғашқы кезеңі аясында 2024 жылы 6 жаңа тұрғын үй пайдалануға берілді. Бұған дейінгі кезеңде 10 үй салынған болатын, деп хабарлайды baq-orda.kz.
Бұл бастамалар ең алдымен әлеуметтік тұрғыдан осал топтарды қолдауға бағытталған. Атап айтқанда, көпбалалы отбасылар мен ерекше қажеттіліктері бар балаларды тәрбиелеп отырған жанұяларға басымдық берілуде.
Жаңа баспаналы болғандардың бірі – тоғыз баланың анасы, «Алтын алқа» иегері Ырымкүл Асқарова. Оның отбасы ұзақ уақыт бойы жеке үйге мұқтаж болып келген. Әсіресе, қыздарының бірінің денсаулығына байланысты ерекше күтім қажет болғандықтан, баспананың маңызы зор еді.
Көпбалалы ана көрсетілген қолдау үшін шынайы алғысын білдіріп, жаңа үйдің кілтін алу олардың отбасы үшін үлкен қуаныш болғанын жеткізді.
Салынған үйлер заманауи талаптарға толық сәйкес келеді. Ғимараттардың қасбеттері сапалы жылуоқшаулағыш материалдармен қапталған, ал шатырлары жауын-шашыннан сенімді қорғайтын профнастилмен жабылған. Барлық үйлер толықтай электр энергиясымен және таза ауыз сумен қамтамасыз етілген.
Сонымен қатар, тұрғын үйлердің айналасы абаттандырылып, көшелер бойына заманауи жарықтандыру шамдары орнатылған. Бұл кешкі уақытта тұрғындардың қауіпсіздігі мен жайлылығын арттырады.
Аталған жоба ауылдық аумақтарды дамыту жолындағы маңызды қадамдардың бірі болып табылады және халықты қолжетімді әрі сапалы тұрғын үймен қамтамасыз етуге бағытталған.
