- Қаржылық мониторинг агенттігі өзіне жүктелген жауапкершілік пен міндетті абыроймен орындап келеді. Қысқа мерзім ішінде көп жұмыс істелді, тәжірибе жинақталды. Бұл табанды еңбек пен адал қызметтің нәтижесі. Агенттік қызметкерлеріне ризашылығымды білдіремін. Бірақ босаңсуға болмайды. Алдымызда биік мақсаттар мен ауқымды жұмыс бар, - деді Мемлекет басшысы.

Президент қазіргі кезеңде цифрлық технологиялар мен жасанды интеллект дәуірі басталғанын айтып, құқық қорғау органдары үшін жаңа тәсілдер мен заманауи құралдарды енгізу аса маңызды екенін жеткізді.

Цифрлық тәсілдер мен жасанды интеллектіні енгізу - кезек күттірмейтін міндет

Қасым-Жомарт Тоқаев құқық қорғау мекемелері технологиялық тұрғыдан артта қалса, бұл ұлттық қауіпсіздікке қатер төндіруі мүмкін екенін ескертті.

- Цифрлық тәсілдерді және жасанды интеллект жүйесін Агенттік қызметіне жаппай енгізу – кезек күттірмейтін аса маңызды міндет. Қазір қылмыс әлемі де жасанды интеллектіні белсенді пайдалануда. Егер құқық қорғау органдары артта қалса, ұлттық қауіпсіздігімізге қауіп төнуі мүмкін, - деді Президент.

Оның пікірінше, замана талабына сай тиімді шешім қабылдап, озық цифрлық шешімдерді қолдану арқылы елдегі реформалардың жедел әрі сапалы іске асуына ықпал ету керек.

Көлеңкелі экономика мен қаржылық алаяқтыққа қарсы күрес күшейеді

Президент өз сөзінде мемлекет қаржысының мақсатсыз жұмсалуы мен әлеуметтік салаға бөлінген қаражатты жымқыру деректерінің әлі де кездесетінін сынға алды.

- Әлеуметтік салаға бөлінген триллиондаған теңгені жымқыратын алаяқтар бар. Бұл - ақылға сыймайтын жағдай. Мұндай кеселді түп-тамырымен жою қажет, - деді Қасым-Жомарт Тоқаев.

Сонымен қатар мемлекет басшысы қаржыны криптовалютаға айналдырып, заңсыз түрде шетелге шығару әрекеттері азаймай тұрғанын атап өтті.

- Қаржыны криптовалютаға айналдырып, шетелге шығару жағдайлары да азаймай тұр. Мұндай заңсыздыққа тосқауыл қою керек. Көлеңкелі экономикамен үзілді-кесілді күресу – өте өзекті міндет, - деді Президент.

Агенттіктің басты миссиясы - мемлекет қаржысының ел игілігіне жұмсалуын бақылау

Мемлекет басшысы Қаржылық мониторинг қызметінің алдында тұрған негізгі міндет – мемлекет қаржысының тек халық игілігіне бағытталуын қамтамасыз ету екенін айтты.

- Мемлекет қаржысының ел игілігіне жұмсалуын қадағалау – аса маңызды міндет. Оның сапалы орындалуы сіздердің қызметтеріңізге тікелей байланысты, - деп қорытындылады Президент.

Жиын барысында агенттік жұмысының тиімділігін арттыру, заңсыз қаржы айналымына тосқауыл қою және цифрлық трансформацияны жеделдету мәселелері негізгі басымдық ретінде белгіленді.