Бүгін, 10:26
Қазақ журналистикасы мен сатира жанрына өзіндік қолтаңбасын қалдырған қаламгер, Қазақстан Жазушылар және Журналистер одақтарының мүшесі Бақытжан Советұлы Әлімқұлов биыл 60 жасқа толып отыр. Ғұмырын ақпарат саласына арнап, радио мен баспасөзде табанды еңбек еткен журналистің шығармашылық жолы – ізденіс пен кәсібіне адалдықтың үлгісі, деп хабарлайды baq-orda.kz.
Бақытжан Әлімқұлов 1966 жылы Жамбыл облысының Меркі ауылында дүниеге келген. Еңбек жолын 1984 жылы Жамбыл ауданындағы «Шұғыла-Радуга» газетінде баспаханашы болып бастаған. Кейін Әл-Фараби атындағы Қазақ мемлекеттік университетінің журналистика факультетін тәмамдап, кәсіби маман ретінде қалыптасты.
Оның еңбек жолы республикалық басылымдар мен өңірлік ақпарат құралдарында жалғасты. 1992 жылы «Санат» республикалық баспасында редактор, 1993 жылы «Ара-Шмель» сатиралық журналында фельетонист қызметін атқарды. 1994 жылы Жамбыл облыстық телерадиокомпаниясының редакторы болып еңбек етті.
2004–2006 жылдары Қазақстан ұлттық телеарнасының Жамбыл облысындағы меншікті тілшісі болды. Ал 2006–2014 жылдары «Қазақстан» РТРК Жамбыл облыстық филиалында редактор қызметін атқарды. 2014–2017 жылдары «Қазақ» радиосының өңірдегі меншікті тілшісі ретінде ел мен жер жаңалықтарын тыңдарманға жеткізді.
2017 жылдан бері Бақытжан Әлімқұлов Жамбыл радиосының жетекшісі қызметін атқарып келеді. Радио саласындағы көпжылдық тәжірибесі мен кәсіби біліктілігі оның өңірлік ақпарат кеңістігінің дамуына қосқан үлесін айқындайды.
Сатира – қаламгердің шығармашылық әлемі
Бақытжан Әлімқұлов журналистикамен қатар әдеби шығармашылықты да қатар алып келеді. Әсіресе сатира жанрында өзіндік үнін қалыптастырған қаламгердің «Мен де бірдеңе дейінші...», «Ерін туралы ертегі», «Бұл мен ғой» атты сатиралық жинақтары жарық көрген.
Сондай-ақ «Күйеу келтір, қыз ұзат, тойыңды қыл» атты той кітабының және балаларға арналған «Қоянның құлағы неге ұзын?» шығармасының авторы. Оның туындыларынан қоғамдағы түрлі мінез-құлық пен өмір құбылыстарын әзіл мен астар арқылы жеткізуге деген ұмтылыс байқалады.
Сатира – шындықты күлкі арқылы жеткізетін күрделі жанр. Бұл бағытта қалам тербеу үшін байқампаздық, ұшқыр ой мен сөзге деген жауапкершілік қажет. Бақытжан Советұлының шығармалары оның журналистік тәжірибесі мен әдеби ізденісінің өзара сабақтасқанын көрсетеді.
Еңбегі еленген журналист
Кәсіби қызметі мен ақпарат саласына сіңірген еңбегі ескеріліп, Бақытжан Әлімқұловқа «Ақпарат саласының үздігі» атағы берілген. Ол Жамбыл облысы әкімінің үш мәрте және Қазақстан Республикасы Мәдениет және ақпарат министрінің екі мәрте Құрмет грамотасымен марапатталған.
Алпыс жылдық ғұмырының қомақты бөлігін журналистикаға арнаған қаламгер үшін бұл марапаттар – ұзақ жылғы еңбектің бағасы. Баспасөзден басталған жолы радиоға жалғасып, бүгінде өңірдің ақпарат кеңістігіндегі жауапты қызметпен ұштасып отыр.
Бақытжан Советұлының шығармашылық және кәсіби жолы – бір мамандыққа адалдықтың, үнемі ізденудің және сөз өнеріне деген құрметтің көрінісі. Мерейтой иесіне зор денсаулық, шығармашылық шабыт, отбасына амандық және қаламынан туған жаңа дүниелердің көп болуын тілейміз!
