Бүгін, 09:07
Жамбыл облысының әкімі Ербол Қарашөкеевтің төрағалығымен өткен аппараттық кеңесте жергілікті маңызы бар автомобиль жолдарының жай-күйі, жол жөндеу жұмыстарының барысы және қоғамдық көлікпен жолаушылар тасымалын ұйымдастыру мәселелері қаралды, деп хабарлайды baq-orda.kz.
Жолаушылар көлігі және автомобиль жолдары басқармасының басшысы Мұрат Саурықовтың айтуынша, биыл жергілікті маңызы бар автомобиль жолдары мен елді мекен көшелерін жөндеуге 23,4 млрд теңге қарастырылған.
Бөлінген қаражат есебінен 73 жоба іске асырылуда. Оның аясында 2 көпір мен 3 теміржол өткелін салу, 5,7 шақырым көшені қайта жаңғырту, сондай-ақ 128,9 шақырым автомобиль жолына орташа жөндеу жүргізу жоспарланған.
Жобалардың 33-і – өткен жылдан өтпелі, ал 40-ы – биыл басталған жаңа жоба. Бүгінгі күнге дейін 19 жоба толық аяқталған.
Жол құрылысының сапасын бақылау тұрақты жүргізілуде. «Жол активтері сапасының ұлттық орталығы» мамандары осы уақытқа дейін 26 нысанда 57 инспекциялық тексеру өткізіп, 184 сынама алған. Бірқатар кемшілікті мердігер ұйымдар жұмыс барысында кезең-кезеңімен жоюда.
Кеңесте қоғамдық көлік саласының жай-күйі де сараланды. Қазіргі таңда облыста 163 автобус маршруты тұрғындарға қызмет көрсетуде. Оның ішінде 13 облысаралық, 27 ауданаралық, 72 ауданішілік және ауылішілік, 46 қалалық және 5 қала маңындағы маршрут бар.
Бұл бағыттарда 34 тасымалдаушы мекеме 814 автобуспен жолаушыларға қызмет көрсетуде.
Автобус паркін жаңарту жұмыстары да жалғасуда. Биыл қалалық бағыттарға 10 жаңа автобус жеткізілді. Жыл соңына дейін тасымалдаушы компаниялар қосымша 40 автобус сатып алуды жоспарлап отыр. Бұдан бөлек, ауданішілік бағыттарға 2 жаңа автобус алынған.
Заңсыз жолаушылар тасымалының жолын кесу мақсатында жыл басынан бері 20 рейдтік іс-шара өткізілді. Оның нәтижесінде Қазақстан Республикасының Әкімшілік құқық бұзушылық туралы кодексіне сәйкес 251 әкімшілік хаттама толтырылып, 2,3 млн теңге көлемінде айыппұл салынды. Бұл бағыттағы жұмыстар алдағы уақытта да жалғасады.
Кеңес барысында облыс әкімі жол құрылысы сапасының талапқа сай орындалуы басты назарда болуы керектігін атап өтті.
– Жол жөндеу жобалары белгіленген мерзімде әрі сапалы орындалуы тиіс. Әрбір жобаның іске асырылу барысына апта сайын мониторинг жүргізіп, жұмыстың уақытылы аяқталуына кедергі келтіретін мәселелерді жедел шешу қажет. Жол құрылысында техникалық талаптар мен қолданыстағы стандарттарға толық сәйкес келетін асфальтбетон қоспалары ғана пайдаланылуы тиіс. Сапасыз материалдарды қолдануға жол берілмейді, – деді Ербол Қарашөкеев.
Сонымен қатар өңір басшысы заңсыз жолаушылар тасымалына қарсы күресті күшейтуді, стихиялық аялдамалар мен бейберекет тұрақтарды жою бойынша мүдделі мемлекеттік органдармен бірлескен рейдтерді тұрақты ұйымдастыруды тапсырды. Бұдан бөлек, аудан орталықтарында автостанциялар немесе жолаушыларға қызмет көрсету пункттерін ашу, сондай-ақ жұмысын тоқтатқан нысандардың қызметін қайта жандандыру мәселесін жеке бақылауға алуды міндеттеді.
Кеңес қорытындысында жауапты басқармалар мен аудан әкімдеріне берілген тапсырмалардың уақытылы әрі сапалы орындалуын қамтамасыз ету жүктелді.
