Бүгін, 08:40
Диқан ауылдық округіне қарасты Жеңіс ауылында көптен күткен қуанышты оқиға орын алды. Елді мекенде заманауи талаптарға сай салынған кіші футбол алаңы пайдалануға беріліп, ауыл тұрғындарына тарту етілді. Бұл игі бастама ауыл жастарының спортпен тұрақты айналысуына жағдай жасап қана қоймай, салауатты өмір салтын насихаттауға бағытталған маңызды әлеуметтік жобалардың бірі ретінде бағалануда, деп хабарлайды baq-orda.kz.
Жаңа спорт нысанының ашылу салтанатына аудан әкімдігі спорт бөлімінің басшысы Олжас Әділханұлы, ауыл әкімі Жұман Абдуалиев, ауыл ақсақалдары Әзімбек Ойықбаев пен Жанарыстан Бакибаев қатысып, тұрғындарды айтулы оқиғамен құттықтады.
Салтанатты жиында сөз сөйлеген азаматтар спорт алаңының ауыл өміріндегі маңыздылығына ерекше тоқталды. Олардың айтуынша, мұндай нысандар жас ұрпақтың денсаулығын нығайтып қана қоймай, бос уақытын тиімді ұйымдастыруға, тәртіп пен жауапкершілікке тәрбиелеуге ықпал етеді. Әсіресе бүгінгі таңда жастарды бұқаралық спортқа тарту – қоғам алдындағы маңызды міндеттердің бірі.
Сондай-ақ спикерлер ауыл тұрғындарының ауызбіршілігі мен белсенділігі, ортақ іске деген жанашырлығы осындай игі жобалардың жүзеге асуына негіз болып отырғанын атап өтті. Бұл – тек спорт алаңының ашылуы емес, ауылдың әлеуметтік инфрақұрылымын дамытуға бағытталған нақты қадам.
Жаңа футбол алаңы енді ауыл балалары мен жастарының сүйікті орнына айналмақ. Мұнда түрлі спорттық жарыстар ұйымдастырылып, жас футболшылардың шеберлігін шыңдауға мүмкіндік туады. Сонымен қатар, бұл нысан ауыл тұрғындарының басын қосатын, достық пен ынтымақты нығайтатын маңызды қоғамдық кеңістік қызметін атқарады.
Спорт – ұлт саулығының кепілі. Сондықтан Жеңіс ауылында ашылған жаңа алаң болашақта көптеген жас таланттардың қанат қағып, үлкен спортқа жол тартуына себеп болады деген сенім мол. Бұл ауылдың ғана емес, тұтас өңірдің спорттық әлеуетін арттыруға бағытталған маңызды бастамалардың бірі болып қала бермек.
