Бүгін, 13:32
Қазақстанда жолаушылар үшін маңызды жаңашылдықтардың бірі қолға алынуда. Мамыр айынан бастап әуе жолаушылары ұшақ бортына музыкалық аспаптарын, оның ішінде ұлттық құндылығымыз саналатын домбыраны алып кіре алуы мүмкін, деп хабарлайды baq-orda.kz.
Бұл туралы Көлік вице-министрі Талғат Ластаев мәлімдеді. Оның айтуынша, қазіргі таңда музыкалық аспаптарды әуе көлігімен тасымалдау мәселесі заңнамалық тұрғыда реттеліп жатыр. Жақын уақытта жолаушылар мен жүктің тасымалдануына қатысты қолданыстағы ережелерге өзгерістер енгізу жоспарлануда.
«Жақын арада біз жолаушылар мен жүктің тасымалдануы туралы ережелерге тиісті өзгерістер енгіземіз. Онда музыкалық аспаптарды қандай тәртіппен алып жүруге болатыны нақты көрсетіледі. Бұл шешім бір ай ішінде қабылданады деп күтілуде», – деді вице-министр Сенат кулуарында өткен брифинг барысында.
Жаңа талаптарға сәйкес, музыкалық аспаптарды тасымалдау тәртібі нақты регламенттеліп, барлық әуе компаниялары үшін ортақ ереже енгізіледі. Бұл өз кезегінде жолаушыларға қолайлы жағдай жасап, мәдени құндылықтарды тасымалдаудағы кедергілерді азайтуға бағытталған.
Бұған дейін жолаушылар арасында домбыра секілді аспаптарды ұшақ бортына алып кіруге қатысты түрлі түсінбеушіліктер жиі туындап келген. Кей жағдайларда аспаптар жүк бөліміне тапсырылып, олардың бүліну қаупі де болған.
Ал жаңа өзгерістер қабылданса, жолаушылар өзімен бірге музыкалық аспаптарын қауіпсіз түрде алып жүруге мүмкіндік алады. Бұл әсіресе өнер адамдары, музыканттар және ұлттық өнерді дәріптеп жүрген азаматтар үшін маңызды шешім болмақ.
Сарапшылардың пікірінше, мұндай бастама ұлттық мәдениетті қолдауға бағытталған нақты қадамдардың бірі. Домбыра – қазақ халқының рухани символы ретінде ерекше орын алады. Сондықтан оны тасымалдауға қолайлы жағдай жасау – мәдени мұраға деген құрметтің белгісі.
Айта кетейік, енгізілетін өзгерістер күшіне енген жағдайда, жолаушылар үшін жаңа талаптар мен шарттар ресми түрде жарияланып, кеңінен түсіндіріледі.
