27 наурыз, 2026
Ақпаратқа сәйкес, Халықаралық Олимпиада комитеті әйелдер санатындағы жарыстарға трансгендер әйелдердің қатысуына ресми түрде тыйым салды. Жаңа ереже 2028 жылы Лос-Анджелес Олимпиадасы мен одан кейінгі ойындарға қатысты қолданылады, деп хабарлайды baq-orda.kz.
Шешімге сәйкес, әйелдер арасындағы жарыстарға тек биологиялық әйелдер ғана қатыса алады. Бұл талап барлық олимпиадалық спорт түрлеріне ортақ болады.
Сонымен қатар, жаңа саясат аясында әйелдер санатына қатысатын барлық спортшылар міндетті түрде бір реттік генетикалық тексерістен өтеді. Атап айтқанда, SRY генін анықтау арқылы спортшының биологиялық жынысы тексеріледі. Бұл тексеріс сілекей немесе арнайы жағынды арқылы жүргізіледі.
Халықаралық Олимпиада комитеті бұл шешімді әділдік пен қауіпсіздікті қамтамасыз ету мақсатында қабылдағанын мәлімдеді. Ұйымның түсіндіруінше, ер адамдарға тән жыныстық жетілу кезеңінен өткен спортшыларда физикалық артықшылық сақталуы мүмкін.
Айта кетейік, бұған дейін трансгендер спортшылардың қатысуы әр спорт түрінің халықаралық федерацияларының құзырында болған. Енді бұл мәселе бірыңғай деңгейде реттеледі.
Жаңа ережелер жоғары деңгейдегі жарыстарға қатысты қолданылады және әуесқой немесе бұқаралық спортқа әсер етпейді.
