Бүгін, 10:06
Иран Украинаға қарсы соққы беруі мүмкін екенін мәлімдеді. Бұл туралы Иран парламентінің ұлттық қауіпсіздік және сыртқы саясат комитетінің төрағасы айтты, деп хабарлайды baq-orda.kz.
Оның сөзінше, егер Киев билігі Израильге әскери көмек көрсетуді жалғастырса, соның ішінде дрон жеткізуге қатысса, Украина аумағы Иран үшін «заңды әскери нысанаға» айналуы мүмкін.
Иран тарапы мұндай мәлімдемені Украина мен Таяу Шығыс елдері арасындағы әскери ынтымақтастыққа байланысты жасап отыр.
Бұған дейін Украина президенті Владимир Зеленский елдің Таяу Шығыс мемлекеттерімен ирандық дрондарға қарсы қорғаныс саласындағы ынтымақтастықты күшейткенін мәлімдеген. Оның айтуынша, украиналық мамандар мен дрондарға қарсы тосқауыл жүйелері Иордания аумағына жіберілген.
Зеленскийдің мәліметінше, Украинадан әскери көмек сұраған мемлекеттердің саны 11 елге жеткен. Олардың қатарында Еуропа және Таяу Шығыс елдері бар.
Сондай-ақ кейбір ақпарат көздерінің хабарлауынша, Сауд Арабиясы да Украинамен қорғаныс саласындағы ынтымақтастыққа қызығушылық танытып отыр.
Қазіргі уақытта халықаралық сарапшылар Ресей мен Иранның бір-бірін қолдап отырғанын айтады. Киевтің дерегінше, Тегеран Ресейге мыңдаған Shahed дрондарын, сондай-ақ оларды өндіру технологиясын берген.
