Бүгін, 09:10
Қазақстандағы «Келешек мектептері» жобасы аясында оқушылардың спортқа деген қызығушылығын арттыруға бағытталған жаңа бастамалар жүзеге асуда. Соның бірі – мектептерде дзюдо клубтарын ашу, деп хабарлайды baq-orda.kz.
Қазіргі уақытта елордадағы 10 мектепте арнайы жабдықталған дзюдо залдары жұмыс істеп тұр. Бұдан бөлек, Қарағанды мен Атырау қалаларында да осындай спорт залдары пайдалануға берілді. Алдағы кезеңде республика бойынша 200-ден астам «Келешек мектебінде» дзюдо клубтарын ашу жоспарланып отыр.
Бұл жоба Қазақстан дзюдо федерациясы және Ұлттық ғылыми-практикалық дене тәрбиесі орталығы бірлесіп жүзеге асырып жатқан маңызды бастама болып табылады. Мамандардың айтуынша, спорттың өзге де түрлерін дамыту мақсатында бадминтон, волейбол және баскетбол федерацияларымен келіссөздер жүргізілуде.
Астанадағы жаңа мектептердің бірінде жұмыс істейтін жаттықтырушының сөзінше, білім ордасы бір жыл бұрын ашылған. Қыркүйек айынан кейін көп ұзамай дзюдо секциясы іске қосылып, қазіргі таңда 4, 5, 7 және 9-сынып оқушылары тұрақты түрде жаттығып жүр. Екі топқа бөлінген 40 бала техникалық және функционалдық дайындықтан өтуде. Жаттықтырушының айтуынша, балаларды болашақта түрлі жарыстарға қатыстыру жоспарланған.
Жас спортшылардың өзі де бұл спорт түріне үлкен қызығушылық танытуда. 13 жасында дзюдомен айналыса бастаған оқушылардың бірі бұл спорттың өзіне ерекше ұнайтынын айтып, сүйікті әдістерінің бірі – «Вадза-ари» екенін жеткізді.
