Бүгін, 10:08
Тараз қаласының аумағын кеңейту жұмыстары Қазақстан Республикасы Үкіметінің 2024 жылғы 29 қарашадағы №1014 қаулысына сәйкес жүзеге асырылды. Соған сәйкес Байзақ және Жамбыл аудандарынан 14 елді мекен Тараз қаласының құрамына қосылды.
Нәтижесінде қаланың аумағы 18 787 гектардан 31 693,7 гектарға дейін ұлғайып, жалпы 12 906,7 гектарға артты.
Жаңа аумақтардың қосылуы жер қатынастарын реттеу жұмыстарын да күшейтті. 2025 жылдан бері жер учаскелерін сәйкестендіру құжаттарын рәсімдеу бойынша жұмыстар жүргізілуде. Бұған дейін Тараз бойынша 65 645 жер учаскесі рәсімделсе, қазіргі таңда бұл көрсеткіш 85 214-ке жетті. Тағы шамамен 11 мың жер учаскесіне құжаттар жер иелерінің өтініштері негізінде әзірленеді.
Қала аумағына жаңадан қосылған жер учаскелеріне сәйкестендіру құжаттарын дайындау және беру жергілікті атқарушы органдармен жасалған шарт негізінде тегін көрсетіледі. Ал қосымша жерге орналастыру жұмыстары қажет болған жағдайда, олар жер иелерінің қаражаты есебінен жүргізіледі.
Бұл өзгерістер Тараздың аумағын ғана кеңейтіп қоймай, қаланың болашақ даму мүмкіндіктерін де арттырады. Сонымен қатар жаңа елді мекендерді инженерлік, көлік және әлеуметтік инфрақұрылыммен қамтамасыз ету, жер учаскелерінің құқықтық мәртебесін толық реттеу сияқты міндеттерді алға шығарады.
Сондықтан Тараздың кеңеюі – әкімшілік шекараны өзгерту ғана емес, қаланың ұзақ мерзімді кеңістіктік дамуына бағытталған маңызды қадам. Алдағы кезеңде басты міндет – жаңа аумақтарды қаланың бірыңғай даму жүйесіне тиімді кіріктіріп, тұрғындарға көрсетілетін мемлекеттік қызметтердің сапасы мен қолжетімділігін қамтамасыз ету.
