Бүгін, 13:16
Сенат төрағасының орынбасары Жақып Асанов журналист Ботагөз Омароваға қатысты жағдайға пікір білдіріп, сөз бостандығы мен құқықтық жауапкершілік арасындағы шекараны түсіндірді, деп хабарлайды baq-orda.kz.
Оның айтуынша, кез келген азамат, оның ішінде журналистер де мемлекеттік қызметкерлердің жұмысына баға беріп, сын айтуға құқылы. Бұл – қалыпты әрі заңмен рұқсат етілген тәжірибе. Мәселен, министрдің, әкімнің немесе судьяның қызметін сынға алу заң бұзушылық болып саналмайды.
Алайда Асанов нақты айып тағылған жағдайда талаптың күшейетінін атап өтті. Егер ақпаратта белгілі бір тұлғаға қатысты заң бұзушылық, мысалы, пара алу сияқты нақты айыптар айтылса, оны дәлелдеу міндетті. Әйтпесе, мұндай мәліметтер жалған ақпарат ретінде бағалануы мүмкін.
Омарова ісі: мәртебе қалай өзгерді
Бұған дейін, 20 наурыз күні журналист Ботагөз Омарова елордадағы полиция бөліміне түсініктеме беру үшін шақырылғаны белгілі болды. Алғашында ол қорғауға құқығы бар куәгер ретінде танылған.
Алайда бірнеше сағат өткен соң оның процессуалдық мәртебесі өзгеріп, Қазақстан Республикасы Қылмыстық кодексінің 274-бабы – «Көрінеу жалған ақпарат тарату» бойынша күдікті ретінде тіркелген.
Әріптестерінің мәліметінше, журналист полиция бөлімінде сегіз сағаттан астам уақыт болған. 21 наурызға қараған түні тергеу соты оған екі ай мерзімге үйқамақ түріндегі бұлтартпау шарасын белгілеген.
Кейін Омарованың тұрғылықты жерінде тінту жүргізілген. Алайда оған қатысты қылмыстық істің нақты қай жарияланымға байланысты қозғалғаны әзірге ресми түрде нақтыланбаған.
Қоғамдағы пікірталас
Бұл жағдай қоғамда сөз бостандығы, журналист жауапкершілігі және ақпараттың шынайылығы төңірегінде қызу талқылауға себеп болды. Сарапшылардың пікірінше, ашық қоғамда сын айту мен нақты айыптаулардың ара-жігін ажырату – маңызды құқықтық мәселе.
